Sá skemmtilegi atburður átti sér stað hinn 19. janúar s.l. að stofnaður var í Reykjavík Karlakór sjómannaskólans. Að hætti vaskra sjósóknara var ekkert verið að tvínóna við hlutina og söngstjóri fundinn hið snarasta. Sá er Þórhallur Barðason óperusöngvari og landsbyggðaberserkur, alinn upp á Kópaskeri, einu fámennasta samfélagi á Norðurslóðum. Þórhallur hefur kennt söng og stýrt áhugamannakórum til nokkurra ára.
Nú þegar eru félagsmenn í kórnum orðnir 40 talsins og starfið fjölbreyttara en stofnendurna nokkurntíma óraði fyrir. Varla hafa þeir átt von á því að skömmu síðar ynni kórinn í Söngkeppni Tækniskólans og kæmi að auki fram í Kastljósi.
Þrátt fyrir ungan aldur á félagið sér nú þegar tvo heiðursmeðlimi, þá Andra Snæ og Braga Fannar Þorsteinssyni, tvíburarbræður og harmonikkutrekkjara frá Hornafirði.
Í öllu röflinu og leiðindunum yfir sjávarútvegsmálum og flestu öðru eru svona fréttir sem demantar í mykjuhaug.
Hér má fræðast meira um þetta frábæra framtak:
