Fyrr í dag átti LS fund með Sigurði Jóhannssyni sjávarútvegsráherra, þar sem rætt var um vanda útgerða krókaaflamarksbáta vegna mikillar ýsugengdar á veiðislóð þeirra.
LS fór yfir stöðu málsins þar sem fram kom að ekkert lát væri á ýsu sem meðafla við þorskveiðar. Hann væri alltaf að aukast þrátt fyrir að menn reyndu að forðast ýsuna eins og hægt væri. Þeir hefðu nú orðið þriggja ára þjálfun í slíku sem dugar lítt þar sem ekkert lát er á vaxandi ýsuafla.
Ýsuafli á fyrsta þriðjungi undanfarinna fiskveiðiára sýndi þetta glöggt, þar sem 2010 hefði verið búið að veiða 37% af úthlutuðum kvóta um áramót, en hlutfallið verið komið í 45% nú um áramótin.
Dæmi væru um að menn hefðu ekki haldið einbeitingu og misst sig í ýsuna og þá væri aflinn jafnvel kominn í 300 kg á bjóð af hreinni ýsu.
Vandamálið væri ekki bundið við einn landshluta, heldur væri ýsuvá nánast á allri grunnslóðinni allt í kringum landið. Auk þess að erfiðleikar með að fá kvóta á leigu leiddi þetta til stóraukins útgerðarkostnaðar. Bátarnir væru á eilífri siglingu af hefðbundinni veiðislóð á staði þar sem álitið væri að minna væri um ýsu. Olíukostnaður við veiðarnar hefði af þessum sökum stóraukist og oftast leiddi þetta af sér verðminni þorskafla og minni afla á hvert bjóð. Hagnaðurinn sem hefði átt að verða af auknum kvóta í þorski léti því bíða eftir sér og margar útgerðir stæðu frammi fyrir stöðvun veiða. Hið óvenjulega veiðimynstur sem óhjákvæmilega yrði að stunda væri vonlaust til lengdar.
LS lagði áherslu á það við ráðherra að auka nú þegar ýsukvótann um fimmþúsund tonn. Það mundi væntanlega nægja til að koma hreyfingu á kvótamarkaðinn og gera hann heilbrigðari en nú er. Dygði það ekki væri óhjákvæmilegt að beita yrði öðrum aðferðum sem krefðust breytinga á lögum um stjórn fiskveiða.
LS gagnrýndi þá aðferðafræði Hafrannsóknastofnunar að lækka stöðugt veiðihlutfallið. Það hefði aðeins verið 39% á síðasta ári, en svo lágt hlutfall heildarveiði úr veiðistofninum hefði ekki sést síðan 1982 eða í rúma þrjá áratugi.
Ráðherra gaf LS ekki tilefni til bjartsýni á lausn málsins. Málið yrði að skoða í samstarfi við ráðgjöf Hafrannsóknastofnunar og athuga hvort vísindamenn þar á bæ teldu efni vera til að breyta ráðgjöfinni svo tilefni væri til kvótaukningar.