Landssamband smábátaeigenda fundaði með Sigurði Inga Jóhannssyni sjávarútvegsráðherra fyrr í þessri viku. Þar lýstu forsvarsmenn LS miklum áhyggjum yfir tillögum Hafrannsóknastofnunar um heildarafla á næsta fiskveiðiári. Einkum lúta þær að veiðiráðgjöf í ýsu og þorski.
Á fundinum hvatti LS ráðherra til að heimila 250 þús. tonna heildarafla í þorski og 50 þús. tonna veiði á ýsu. Félagið færði margvísleg rök fyrir tillögunum, þar sem þyngst vegur upplifun sjómanna á miðunum allt í kringum landið. Litlu skiptir þar í hvaða veiðarfæri er veitt, alls staðar gríðarlegt magn af þessum tegundum.
Í viðræðum við ráðherra var sérstaklega vikið af ýsunni. Það er mat LS að verði jafn mikið af ýsu á veiðislóð eins og verið hefur á yfirstandandi fiskveiðári samhliða því að kvótinn verði minnkaður um fimmtung, mun það leiða til óyfirstíganlegra vandræða fjölmargra smábátaútgerða.
