Gildi lífeyrissjóður hefur tilkynnt hækkun á vöxtum lána hjá sjóðfélögum. Í bréfi sjóðsins er sagt að vextir á sjóðfélagalánum sem nú eru 3,10% verði á næsta gjalddaga 3,35%.
Þeir sem haft hafa samband við Landssamband smábátaeigenda vegna þessa eru gjörsamlega orðlausir yfir háttalagi sjóðsins. „Í stjórninni er örugglega lið sem ekkert fylgist með því sem er að gerast á landinu, eins og einn viðmælandi LS orðaði það. Hann skoraði á félagið að krefjast þess að ákvörðunin yrði tafarlaust dregin til baka og sjóðfélagar sem hlut ættu að máli yrðu beðnir afsökunar á áreitinu.
Í áðurnefndu bréfi Gildis er engra skýringa getið hvers vegna vextir séu hækkaðir né að tilkynningu sé að finna um málið á heimasíðu sjóðsins.
Ákvörðunin er í raun óskiljanleg þar sem í stjórn Gildis sitja fulltrúar Samtaka atvinnulífsins og launþega, en báðir aðilar hafa gefið út að vextir séu of háir í landinu.
Formaður stjórnar Gildis lífeyrissjóðs er forstöðumaður kjaramálasviðs Eflingar og varaformaður sjóðsins er framkvæmdastjóri Samtaka atvinnulífsins.
Ekki þarf að leita lengra en í Viðskiptablaðið frá 11. desember sl. þar sem greint er frá viðbrögðum Samtaka atvinnulífsins við stýrivaxtalækkun Seðlabankans. Fyrirsögnin er „SA fagna lækkun. Í niðurlagi fréttarinnar um yfirlýsingu samtakanna segir eftirfarandi:
„Að jafnaði vænti stjórnendur 2,5% verðbólgu næstu tólf mánuði sem sé í samræmi við verðbólgumarkmið Seðlabankans. Í yfirlýsingu kemur einnig fram að samtökin hafi ítrekað bent á að vextir hér á landi verði að lækka. Heimili og fyrirtæki líði fyrir of háa vexti miðað við nágrannalöndin.
