Heildarútflutningsverðmæti makríls á síðasta ári nam alls 22,4 milljörðum.  Það er rúmum 2,2 milljörðum meira en á árinu 2013.   Heildarmagn bakvið verðmætin voru tæp 124 þús. tonn sem er 17% aukning milli ára.  Meðalverð 2014 var hins vegar 5% lægra en á árinu 2013.

Rússland er eins og fyrr okkar helsta viðskiptaland.  Þangað fór 30,5% heildarmagnsins sem svaraði til 35% alls útflutningsverðmæta makrílsins.  Mikilvægi Rússlandsmarkaðar sýnir sig best með að skoða þær tvær þjóðir sem næstar eru í magni og verðmætum, Holland og Nígería.  Þangað fóru alls 46 þús. tonn, eða rúmum 8 þús. tonnum meira en til Rússlands.  Verðmæti þess magns var hins vegar 554 milljónum lægra en það sem Rússar greiddu.