Grásleppuvertíðin er hafin um land allt, ef undan er skilið svæðið á innanverðum Breiðafirði þar sem veiðar hefjast 20. maí. Veiðin hefur verið í meðallagi á flestum svæðum er undan er skilinn Húnaflói og Skagafjörður þar sem veiði er yfir veiði meðalvertíðar.
Þegar á heildina er litið hefur hver dagur gefið nokkru minni veiði en í fyrra, en á það ber að líta að þá var grásleppuveiði betri en nokkru sinni fyrr.
Samkvæmt upplýsingum um afla á vef Fiskistofu hafa nú veiðst 586 tonn af óslægðri grásleppu, en á sama tíma í fyrra höfðu veiðst 961 tonn. Vertíðin í ár hófst þann 26. mars en í fyrra var byrjað á hefðbundnum tíma þann 20. mars.
