Að undanförnu hefur komið í ljós nokkur ágreiningur um samþykkt síðasta aðalfundar LS um að hafna kvótasetningu á grásleppu.  Ýmis sjónarmið hafa þar verið viðruð og því miður hefur angi umræðunnar farið út fyrir það sem satt er.  

Í grein Stefáns Guðmundssonar Húsavík gagnrýnir hann undirritaðan fyrir að hafa ekki breytt fyrirsögn í frétt sem hann sagði hafa komið á heimasíðu LS í kjölfar aðalfundar.  Þar hefði staðið: „Afgerandi meirihluti félagsmanna á móti aflamarki í grásleppu, en þar hefði átt að standa „Naumur meirihluti gegn aflamarki…. og jafnvel innan skekkjumarka.  

Gagnrýni Stefáns kemur eftir að hann lýsir vaxandi áhuga sínum á málefnum LS, „en þó ekki síður fyrir þá grímulausu einstefnupólitík sem rekin hefur verið af framkvæmdastjóra og formanni undanfarið ár eða svo, í málefnum grásleppuveiða.

Svo að félagsmenn fái rétta mynd af gagnrýni Stefáns er hér birt frétt um málefnið.  

Fyrirsögn fréttarinnar þann 23. október 2019.

Engum félagsmanni LS dylst að um grásleppumálin er hart deilt.  Það sem undirrituðum er hins vegar lagt upp í hendurnar til að vinna eftir er samþykkt aðalfundar félagsins.  Eins og fram kom í fréttinni sem hér var vitnað til var hún afdráttarlaus.

Næstkomandi föstudag verður síðari hluti aðalfundar LS.  Þar liggur fyrir tillaga sjávarútvegs- nefndar fundarins um að hafna öllum hugmyndum um kvótasetningu á grásleppu.  Í fyrra var samhljóða tillaga naumlega samþykkt.  Hver niðurstaða aðalfundar verður er óvíst.  Það er aftur á móti deginum ljósara að fundir og þá jafnt aðalfundir svæðisfélaga og aðalfundir LS eru m.a. til að marka þá stefnu sem fylgt er í hinum ýmsu málum.