Birt hefur verið í Stjórnartíðindum reglugerð um úthlutun aflamarks í grásleppu til nýliða.

Í 2. gr. reglugerðarinnar er skilgreining á hverjir teljist nýliðar og eiga þannig rétt á aflamarki úr afla sem dreginn er frá við úthlutun samkvæmt aflahlutdeild (5,3%)

„2. gr.

Nýliði samkvæmt reglugerð þessari telst sá aðili sem á skip, sem ekki hefur skráða aflahlutdeild og hefur ekki fengið aflahlutdeild í grásleppu vegna fiskveiðiársins 2024/2025.“

Fiskistofa mun auglýsa eftir umsóknum um aflamark fyrir skip í eigu nýliða og úthluta aflamarki í grásleppu á grundvelli umsókna.  Aflamark til nýliða mun skiptast jafnt og getur hver þeirra fengið að hámarki 0,4% af leyfilegum heildarafla.  

Alls óvíst er hver verður leyfilegur heildarafli á vertíðinni 2025, en verði hann 4.030 tonn eins og á síðustu vertíð koma 214 tonn til skipta, hámark á hvern bát 16 tonn.

__________________________________

LS minnir á orðsendingu Fiskistofu frá 21. nóvember sl. varðandi mikilvæg atriði um hlutdeildarsetningu grásleppu.

• Flutningur veiðireynslu: Áður en til úthlutunar kemur er leyfilegt að flytja veiðireynslu á milli skipa ef breyting hefur orðið á skipakosti, svo sem kaup, sala skips eða skip tekið af skipaskrá. Skila þarf in beiðni um flutning fyrir 2. janúar 2025.

• Flutningur hlutdeilda og hámarksaflahlutdeild: Óheimilt er að flytja hlutdeildir í grásleppu milli skipa til 31. ágúst 2026 nema verið sé að gera ráðstafanir til að koma skipum sem fá umfram 1,5% í lögbundið hámark.

• Heimahöfn – staðbundin veiðisvæði:  Þegar hlutdeildum er úthlutað þá festist hlutdeildin og aflamarkið á því veiðisvæði sem skipið er skráð á á þeim tímapunkti.  Fiskistofa miðar í því sambandi við heimahöfn skips samkvæmt skipaskráSamgöngustofu.