Birt hefur verið í Stjórnartíðindum auglýsing um veiðigjald fyrir árið 2026.  Gjaldið miðast hvert kíló óslægðs afla sem landað er á tímabilinu 1. janúar til 31. desember 2026. 

Tegundir sem bera veiðigjald eru 20, jafnmargar og á yfirstandandi ári.  Nýjar á listanum eru grálúða, sandkoli og lúða sem bera nú veiðigjald, en þær sem falla út af listanum eru loðna, skötuselur og gulllax.

Eins og sjá má á töflu sem hér fylgir hækkar gjald á þorski um 77,1% milli ára.  Fer úr 28,68 kr/kg upp í 50,79 kr/kg.  Veiðigjald á ýsu hækkar um 13,4%, ufsa um 5% og veiðigjald fyrir grásleppu hækkar um 69%. Steinbítur lækkar um 17%, langa 22,5% og veiðigjald fyrir keilu lækkar um 26%.   

Hér er þó ekki öll sagan sögð þar sem í umræðu á Alþingi og meðförum atvinnuveganefndar um leiðréttingu veiðigjalda var tekið tillit til sjónarmiða smábátaútgerðarinnar og minni útgerða.  Afsláttur heldur áfram 40% á öllum tegundum upp að 9 milljóna króna álagningar.  Þorskur og ýsa falla hins vegar ekki undir þennan flokk, þar er afsláttur hækkaður úr 40% í 65% af fyrstu 15 milljónum álagningar veiðigjalds og 45% af næstu 55 milljónum álagningarinnar. 

Fjárhæðirnar taka breytingum samkvæmt vísitölu neysluverðs til verðtryggingar frá janúarmánuði þessa árs.