Nú er kominn á flug sá misskilningur að Fiskistofa hafi úrskurðað að ekki sé hægt að fella niður grásleppukvóta án bóta.

Þessi misskilningur á rætur sínar að rekja til ræðu Bergþórs Ólasonar, þingmanns Miðflokksins, í ræðustól Alþingis á 73. fundi 157. löggjafarþings þann 18. febrúar 2026. Í ræðu sinni sagði Bergþór orðrétt:

„Á síðasta þingi, á síðasta löggjafarþingi, kom fram umsögn frá Fiskistofu, sem er nú einmitt gestur á fundi atvinnuveganefndar í fyrramálið, og í umsögn Fiskistofu í fyrra, eða sem sagt á síðasta þingi, kom fram, með leyfi forseta. Þetta er umsögn sem barst 28. maí 2025. Þar segir, „Fiskistofa fær ekki séð að hægt sé að fella niður hlutdeild skipa og færa réttindi til að stunda grásleppuveiðar yfir á önnur skip án þess að bætur komi fyrir. Þótt skýrt komi fram í 3. málslið 1. greinar laga um stjórn fiskveiða, að úthlutun veiðiheimilda myndi ekki eignarrétt eða óafturkræfanlegt forræði einstakra aðila yfir veiðiheimildum, þá njóti veiðiheimildir vissrar verndar sem atvinnuréttindi. Að mati Fiskistofu verða þau réttindi ekki færð til annarra aðila bótalaust.“ Og afstaða gesta Fiskistofu var enn skýrari á nefndarfundinum á síðasta þingi heldur en kemur fram í þessum texta.“

Hið rétta er að þeir vankantar á fyrra frumvarpi sem að Fiskistofa gerði athugasemdir við og þingmaðurinn vísar til voru lagfærðir í því frumvarpi sem nú liggur fyrir Alþingi. Af þeim sökum var engin ástæða til að ræða skaðabótaskyldu í umsögn Fiskistofu um fyrirliggjandi frumvarp: með niðurfellingu á hlutdeild skipa eru réttindi til að stunda grásleppuveiðar EKKI færð yfir á önnur skip.