Almennur fundur var haldinn í smábátafélaginu Hrollaugi vegna þeirrar stöðu sem upp er komin vegna skerðingar á strandveiðipotti á svæði D. Mikill uppgangur hefur verið í strandveiðum á Höfn og búist við um 30% fjögun báta milli ára. Skerðing aflaviðmiðunar nokkrum dögum fyrir upphaf veiðanna er því áfall og setur áætlanir úr skorðum.
„Ályktun frá smábátafélaginu Hrollaugi
Félagsmenn Hrollaugs eru ævareiðir vegna ákvörðunar ráðherra um að skerða strandveiðipott á svæði D um 200 tonn.Að skerða veiðiheimildir strandveiðimanna á svæði D er algjörlega á skjön við þá kvótaaukningu sem orðið hefur á þessu ári og ekki síst í ljósi þess að heildar strandveiðipotturinn hefur verið aukinn um 400 tonn frá fyrra ári.Margir nýir menn eru að hefja strandveiðar á svæði Hrollaugs í ár og finnst þeim þetta vægast sagt dapurleg ákvörðun hjá sjávarútvegsráðherra.
Samkvæmt meðfylgjandi töflu frá Atvinnuvega- og nýsköpunarráðuneytinu getum við ekki séð tilefni til skerðingar, rauðlitað hefur verið bætt inn af Hrollaugi.
Við skorum hér með á sjávarútvegsráðherra að endurskoða ákvörðun sína sem varðar skerðingu strandveiðipotts á svæði D.
Hornafjörður 28. apríl 2016
Fh. Hrollaugs
Elvar Unnsteinsson formaður
Von SF 2, á strandveiðum
