Aðalfundur Snæfells var haldinn í Grundarfirði 27. september sl.

Tillaga sjávarútvegsráðherra um breytingar á strandveiðikerfinu lagðist afar illa í fundarmenn.   Einhugur var um að mótmæla því harðlega að hverfa aftur til fyrra veiðikerfis sem allir flokkar á Alþingi samþykktu að leggja af 2018.  Þar hefði vegið þungt að breytingin mundi auka öryggi sjómanna á strandveiðibátum.  Nú væri brýnt að stíga lokaskrefið í átt til öruggari veiða með því að tryggja að dagar til strandveiða verði aldrei færri en 48 talsins.

Einhugur var um að fordæma vinnubrögð sjávarútvegsráðherra við framkvæmd grásleppuveiða á síðustu vertíð.  Með þeim hefði grásleppuútgerðum verið freklega mismunað og skemmdarverk unnið á stjórnkerfi veiðanna.  

Mestur hluti grásleppuumræðunnar fór hins vegar í að ræða hvort áfram ætti að byggja veiðistjórn á núgildandi kerfi eða kvóta á hvern bát.  Bæði kerfin hefðu sína kosti og galla.  Samkomulag var um að ef sett yrði á aflamark yrði að tryggja að allir sem væru með grásleppuleyfi í dag fengju einhverja veiðiheimildir.

Mikilvægi línuívilnunar væri nú meira en oft áður, þegar horft væri til aukins atvinnuleysis.  Bregðast þyrfti við með að hækka ívilnun úr 20% í 30% og tryggja öllum dagróðrabátum línuívilnun.

Á fundinum var rædd skýrsla starfshóps um „faglega endurskoðun varðandi notkun veiðarfæra, veiðisvæða og verndunarsvæða á Íslandsmiðum.  Hugmyndum hópsins um lokun svæða fyrir handfæraveiðum var harðlega mótmælt.  Í stað reglugerða- og skyndilokana á handfæraveiðar ætti að beita sektum eða sviptingu veiðileyfis á þá aðila sem koma með of smáan fisk að landi.

Sjá allar samþykktir fundarins.

Tillögur Snæfells 2020.pdf til 36. aðalfundar LS