Frá Árskógssandi voru gerðar út 3 bátar á grásleppu þetta árið og er það fækkun um 1 bát. Veiðarnar hófust á tilsettum tíma 30. mars. Vertíðin var með stysta móti sökum þess hversu lítið veiddist og þá var áhugi takmarkaður þar sem lágt verð var í boði fyrir hrognin. Að sögn Péturs Sigurðssonar formanns Kletts sem gerir út bátana í félagi við aðra er grásleppuvertíðinni lokið, allir bátarnir búnir að draga upp. Vertíðin náði því ekki einum mánuði, en vanalegt er að hún standi í rúma 2 mánuði. Pétur sagði vertíðina þó verða eftirminnilega fyrir fleiri sakir þar sem óvenjulegur gestur hefði komið í grásleppunet hjá einum bátanna. Það var um miðjan mánuðinn þegar skipverjar á Særúnu EA voru að draga grásleppunetinum að í einu þeirra var stærðarinnar hrefna. Áhöfnin á Særúnu gat komið böndum á ferlíkið og dróg það í land. Þegar þangað var komið gáfu sig fram vanir skurðarmenn og handfjötluðu skepnuna eftir kúnstarinnar reglum þannig að sem mest kjöt nýttist.
Myndin sýnir áhöfnina á Særúnu, f.v. Konráð Sigurðsson, Sigurður T. Konráðsson, Sigurður Ó. Konráðsson og Kristján Freyr Pétursson með fenginn fyrir framan sig.