„Er Fiskistofa gagnslaus í viðurlögum nema þegar kemur að því að hrella menn sem gleyma að skila afladagbókinni á réttum tíma?“ spyr grásleppuveiðimaður sem horfir upp á það dag eftir dag að grásleppa er seld á fiskmörkuðunum. Þannig hafa á síðustu 4 vikum verið seld 17 tonn af grásleppu á Íslandsmarkaði þrátt fyrir að skylt sé að sleppa henni sé hún veidd í net af bátum sem ekki stunda grásleppuveiðar skv. sérstöku leyfi. „Hvernig má þetta vera?“, er spurt af örgum veiðimanni sem hafði samband við skrifstofu LS í dag.
Í reglugerð um nýtingu afla og aukaafurða er ákvæðið sem hér er vitnað til. 1. gr. orðast svo: „Skylt er að hirða og landa öllum afla sem í veiðarfæri kemur. Þó er þeim aðilum sem stunda netaveiðar, aðrar en grásleppuveiðar skv. sérstöku leyfi Fiskistofu, skylt að sleppa allri grásleppu, sem er lifandi í netum þegar þau eru dregin.“
Aðalfundur LS 2003, samþykkti eftirfarandi um það mál sem hér er til umfjöllunar:
„Þeir einir stundi grásleppuveiðar sem hafa til þess leyfi
Aðalfundur LS krefst þess að Fiskistofa framfylgi lögum um grásleppuveiðar og komi í veg fyrir að aðrir en þeir sem grásleppuleyfi hafa stundi grásleppuveiðar, landi grásleppu og grásleppuhrognum.
Ath. Óheimilt er með öllu að nýta hrogn úr dauðri grásleppu. “
Hér með er ályktunin áréttuð og Fiskistofa hvött til að herða eftirlit með þessum ólöglegu veiðum.
Verði framhald á að það sé látið átölulaust að grásleppu sé landað og seld á mörkuðum utan leyfilegs veiðitíma gæti það skaðað viðkvæman grásleppuhrognamarkað og þar með rýrt möguleika grásleppuveiðimanna á viðunandi afkomu af veiðunum.
